Həyat hekayəsi
Zeynalov Teymur Tağı oğlu 28 mart 1993-cü ildə Bakı şəhərində anadan olmuşdur. 1999-cu ildə Binəqədi rayonunda yerləşən 30 saylı məktəbdə təhsil almağa başlamşıdır. Orta məktəbi əla qiymətlərlə oxumaqla yanaşı karate idman növü ilə də məşğul olmuşdur. Müxtəlif uğurlar əldə etmişdir. 2010-cu ildə Dövlət İmtahan Mərkəzin tərəfindən keçirilən qəbul imtahanından 640 bal toplayaraq Azərbaycan Dövlət İqtisad Universitetinin Maliyyə fakültəsinə daxil olmuşdur. 2014-cü ildə təhsilini bitirib hərbi xidmətə yollanmışdır. 2015-ci ildə hərbi xidmətdən qayıtdıqdan sonra SOCAR AQŞ-də mühasib kimi çalışmağa başlamışdır. 2017-2019-cu illərdə Azərbaycan Dövlət İqtisad Universitetində magistr təhsili almışdır. 2019-cu ildə ailə həyatı qurmuşdur. 2020-ci il sentyabrın 28-də Hərbi Komissarlığın çağırışı ilə Vətən Müharibəsinə yollanmışdır. Azərbaycan Ordusunun əsgəri olan Teymur Zeynalov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı torpaqlarımızın azadlığı uğrunda gedən döyüşlərdə iştirak etmişdir. Teymur Zeynalov oktyabrın 24-də Füzuli döyüşləri zamanı şəhid olmuşdur. Bakı şəhərində dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin müvafiq Sərəncamlarına əsasən Teymur Zeynalov ölümündən sonra "Vətən uğrunda", "Füzulinin azad olunmasına görə", "Laçının azad olunmasına görə" medalları ilə təltif edilmişdir.
Şəhadətindən 5 ay sonra adını özü qoyduğu Oğuz adlı övladı dünyaya gəlmişdir.